sew skirt..

بسم الله الرحمن الرحيم...

اليوم البوست حيكون عن.....

دا الاستايل مررررة عاجبني النيلي مع المقلم رائع فحبيت يكون عندي دا اللبس فقلت التنورة سهله مايباله مجهود وينفع للمبتدئات زيي والتي شيرت متوفر في اغلب المحلات ..
الموهم بوست اليوم كيف نسوي تنورة زي الي في الصورة..
نحتاج؟!

قماش مقلم تلقونه في اغلب محلات القماش يجي نوعين شيفون وستان الستان مايحتاج بطانه واسهل في الشغل بس ماحصلته في المحل الي رحته فجبت شيفون ويباله بطانه, البطانة استرتج ابيض عندي من زمان احتجت تقريبا متر من الشيفون لاني سويته ميدي اذا تبيه طويل متر ونص او مترين يكفي علي حسب عرض القماش, ونحتاج مقص ومطاط اسود.
يلا بسم الله نبدأ...

ناخذ المقاسات الطول 28محيط البطن 33ومحيط الورك40 محيط السيقان 26
ونحدد بصابونة الخياطة ونقص مع مراعاة مسافة القص وحاولو تكبرو احسن من انو يصغر ويخرب القماش.

نخيطط مكان العلامات ونثنيه من تحت ونخيطوو.

نفرش القماش المقلم ونحط البطانة فوقه ونقصه زي البطانة بالضبط بس نضيف 1سم احتياط من الجهتين.

نخيطو من الجهتين زي ماسوينا في البطانة..

 ندخل البطانة داخل الشيفون المقلم ونثبته بالدبابيس ونخيطط ..

حاولي تسحبي المطاط وانتي تلفيه حوليين بطنك بس مو تسحبيه بقوة , وتخيطيه يعني تقفلي المطاط , وبعدين تخيطيه علي القماش وحاولي تسحبي المطاط سحبه خفيفه وانتي تخيطي..

نثنيه من تحت..

حبيت اعمل فتحه من الجهتين عشان يسهل المشي وثنيته بس احلي نعمل فتحه من ورا وشايفيين الخيوط الطالعه دي في ماكينة تنظيف علي مااعتقد تلم الخيوط دي بس ماعندي فانا حرقته بالولاعه عشان يترتب.

شكل الفتحه..

وبكذا نكون خلصنا...

البلوزة النيليه كانت من ضمن مشترياتي البلوزة طويلة شوية فقررت اقصها زي الصورة الموهم اللبس ع المنكان مو حلوو دبه من فوق ونحيفه من تحت اللبس يجي علي الجسم نفس الصورة بالضبط اللهم حقي ميدي وحقت البنت طوويل..
اتمني البوست يكون مفيد لكم واذا ماعندك ماكينه او ماتعرفي تشتغلي عليه خيطي بيدك واتمني للجميع التوفيق..
GOOD LUCK

haul..مشترياتي

بسم الله الرحمن الرحيم...

اااااااع من زمان عن التدوين اشتقت للتدوين لانو دي الفترة انشغلت مرررة لاني مسافرة وكل يومين السوق وليتني اقضي لنفسي اقضي لاختي واخويا اكثر شيء انا صح قضيت بس اشياء بسيطة لانو احس عندي الي يكفيني فبلاش اسرااف..
واليوم حبيت يكون تدوينتي عن الاشياء الي اشتريتها بدي الفترة وان شاء الله حنزل قبل مااسافر شوية اشياء تكون مفيدة لكم وان شاء الله تعجبكم وحنزل طريقتي في ترتيب شنطة السفر بس خلونا اللحين في موضوعنا الي هيا مشترياااتي...

نبدأ بالملابس ماشريت الا ثلاث قطع...

جينز غامق من سنتر بوينت حبيتو وبما اني هريت الجينز الغامق الي عندي فكنت محتاجه من سنتر بوينت ب120

بلوزة مرة حبيتهااا بمحل من المحلات الي في العرب وانا امشي شفته اول مرة اشتري منه مررة حبيته واقدر انسق منه كذا تنسيق ب130

دا التي شيرت شريتو لهدف معين حيكون له بوست كامل بإذن الله بكرا من سنتر بوينت ب20 ريالز..
نجي اللحين للعطور..

عطرين واحد من jadore dior اول مرة اشتريه فعجني ريحته يوم شميته بالمحل انثووي وكلاسيك شميت الي مويتها ذهبي غامق ماعجبني وشميت التواليت وفي البيرفيوم بس ماحصلته ثباته مررة قوي بس ذا اودي بيرفيوم ثباته اقل شوية من البيرفيوم بس روووعه بالنسبة ليا والنااس اذواق طبعا, ثاني عطر من GUCCI GUILTY دا العطر قديم طبعن بس كل مااشتري عطر لازم اشتريه معاها احسه عطر الكلاسيك ريحته جاذبيه سعره ب300 وشيء وديور ب600 وشيء.
نجي اللحين للميك أب..

ااااع اللون مو واضح قلك اتفنن واعدل بالصور الموهم هوا لون بنك علي لحمي يجنننن انا مدمنة ارواج ريميل لندن واللون الاورنج هاديء وناعم مش الاورنج الفاقع اللونين روعه مع اللوك البرونزي..

برونزمن بودي شوب زممان كنت استخدم البودرة السائبة برضضو من بودي شوب كان احلي من دا دا فيلو لمععه بس داك كان ماات وبرونز من قلب راائع بس القهر قطعووه كل شيء حلو ويعجبناا يقطعووه الموهم داا عاجبني بس الي من شانيل اروع بس دا بديل رخيص لشانيل سعره 89..

فرشة ايلاينر من مكياجي انا استهلك فرش الايلاينر لانو كل ماكياجي ايلاينر وروج جودتها حلوة ب36..

ماسكرا من ميبيليين اول شيء لونوو بننك وتفاحي جمييل هوا فكرتو انو يعطيك لوك طبيعي مابيعطي كثافه ولا طول اللهم شوية سواد بس الي شفتو انو لمن احط ثاني طبقه رموشي تصير كثييففه كانها كثافه طبيعيه ومفرقه وكل مازيد طبقه كل ماتكثف بس تكون طبيعيه اكتفيت بطبقتين حبيتها للنو ميك اب لوك وللاستعمال اليومي ب30 وشيء ..

مناكيرتيين العودي مو نفس الي حاطتوو الي انا حاطتو احسها تبهت اليد مو مرة عاجبتني اما دي الدرجة روووعه تنور اليد من ريفلون رقمها 560 سعرها 30 ريالز والاورنج من ريميل لندن رقمها 18 ب12 ريالز عليها تخفيض..
نجي اللحين للاكسسوارات..

نيكلس مررررة عجبني من اكسسواريز لونه زيتي مرررة حلو خاصة اذا فستانك مافيها تفاصيل كثيرة ولبستيه معااه بيعطيك فخامه ب65

اساور من كووتن مرررة حبيتها الوانها منت حبيتهاااا ب35

دي الاسورة اشتريها لثاني مرة شريتها اول اخذتها بنت عمي وقلتلها اذا ماحلصتها برجع اخذ حقتي لاتها مررة عجبتني والحمد لله لقيتها من سنر بوينت ب35

عشققي الحلقان شايفيين الي ب10 ريال ماكثير حبيتها بس لمن شفت سعرها قلت بتنفعني وحبيتها من سعرهاا والي جمبها الثعبان من نيو لوك اللحين طالعين بالحلقان الي زي كدا حبيتها والصغيرة الي تحت نااعمه والي جمبها اكثر شيء حبيتها لونه ابيض لوول مررة انيق الي من نيولوك ب25 والورده البيضاء ب38 والصغيرة عليها تخفيض ب15

نسيت اصور دا الحلق مع الباقي الموهم دا استعملو لفتحه الاذن الي فوق او الي تحت علي حسبب..

ربطه شعر والثاني ربطة لديل الحصاان جمييييل ذهبي تجيط زي الاسوره مرررة حلووة الربطة ب25والربطة حق ديل الحصان ب22

اسبريه من لوريال استخدمه من سنين تثبيتو عاادي وفي منه قوووي احس لمن استخدمه شعرري ماينكش ابدددن حتي لو الجو رطب الا اذا كانت الرطوبة عاليه دا شيء ثاني..
مشترياتي العشوائية...

علبة نظارة من الدو لوونه بننك  ب40 ونوووت من سنتر بوينت ماادري اذا في اشكال احلي ماشفت غيره كان مخلص بس احب اشتري نوتات عشان اسجل فيه كل شيء يجي ببالي قبل لاانساه انا نسايه ترا واحب اذا شيء عجبني ستايل كلام اي شيء يعجبني اسجله بالنوت ب25 واخر شيء كفر جوالي جالكسي نوت 2 اسود مخررم علي شكل فراشه وفيله فصوص ب40 .

وبكذا يكون خلصت من المشترياات انتظروني في بوست جديد وان شاء الله القادم بيكون احلي ومفييدد اتمني دعمكم واتقبل جميع التعليقات ايجابية كانت او سليبة لانو زي ماقلت الاذواق تختلف الي يعجبني مو شرط يعجب غيري واتمني للجميع اجازة صيفيه ممتعه..
GOOD LUCK

طريقة عمل تنورة تل + outfit

بسم الله الرحمن الرحيم...

اليوم البوست حيكون كيف نسوي تنورة من التل بيدنا وتكون انيقه وجميلة, احساس جميل اننا نلبس شيء احنا نسويه بيدنا تحسي بإنجاز.. التنورة لاأختي الصغيرة عمرها 8 سنوات...
اول شيء لمن تبي تسوي شيء لازم ننتبه لاأشياء بسيطة لمن تروحي تشتري القماش لازم تراعين عمر الي بتلبسو عشان تعرفي تختاري اللون, يعني اختي عمرها 8 مابيطلع حلو إذا لبستها لون اسود او الوان غامقه , ولازم نراعي احنا في اي موسم , ولمن نختار القماش لازم ننتبه لملمس القماش لانو التل في انواع خشنه وتجيب الحر وفي انواع ناعمه .. 
يلا نبدأ بالصور وحاولت اني اوضح الخطوات وان شاء الله يكون سهل عليكم...

دي هيا الاقمشه الي استعملتها تل واسترتج لونه سماوي الاسترتج حيكون البطانة...
ثاني شيء حناخذ المقاسات: مقاس البطن_طول البطانة_طول التل ...
انتو بكيفكم تبون البطانة تكون بنفس طول التل او اقصر انا حبيت اخلي البطانة قصيررررة والتل تقريبا ميدي.
اللحين لمن اخذت مقاس بطن اختي طلع 27سم ولمن اخذ مقاس التل ادبل ال27 يصير 54 لانو احنا بنسوي في التل كسراات مع باقي الصور حتفهمو قصدي ان شاء الله.

نفرد الاسترتج علي الارض ونحتاج مقص ومتر وصابونة خياطة ودبابيس.

نحدد طول البطن الي اخذناه ونثني المتر نفس ماكنا نقيس ونحط دبوس من بداية المتر لنهايتو عند 27سم, وناخذ الطول الي يناسبنا اذا تبيه اقصر او اطول براحتش ونحط الدبوس عند الرقم الي نباه وخلاص نشيل المتر حيكون في الدبوس علامة للمكان الي نبيه.

في الصورة رقم 3 مسكت الاسترتج بالدبابييس عشان مايتحرك معانا القماش واحنا نخيط وعشان يكون علامة للمكان الي نخيطوو, وفي الصورة رقم 4 نخيط الجمبيين وكل مانوصل عند دبوس ننزلو ونمشي بالمكينة لانو ابرة المكينة اذا جت علي الدبوبس بتنكسر الابرة , وفي الصورة رقم 5نثني التنورة من تحت, ملاحظة اذا كنتي مبتدئة بالمكينة اشبكيه علي 110 عشان تمشي بطيء وتعرفي تتحكمي فيه وكمان الي مايعرفو يستخدمو المكينة عادي تخيطيه بيدك...

اللحين نجي للتل نثنيه ونقصو بالاختصار نبا نخلي قطعة القماش قطعتين..
ملاحظة: استخدمت مترين قماش تل ومتر للإسترتج لاني ابا طبقتين من التل فيكفيني مترين لبنت عمرها 8 اما لبنت بقدي حيكفي 4 امتار واذا تبو التل يكون طبقااات كثير حتزودو في الامتار .

 8نفرد اول قطعة من التل ونثني وندبسو بالدبوس ونستمر لين اخر القماش 9 نخيط عشان يثبت الثنيات او الكسرات وكل مانخيط نخرج الدبوس عشان مايكسرلنا الابرة ونكرر نفس الطريقة ونعمل قطعتين واذا حابيين تكثرو براحتكم , 10 نثبت القطعتين ونخيطهم مع بعض ,11 شكلها النهائي.

12 ندخل البطانة داخل التل , 13 نثبتو بالدبابيس , 14 نخيط البطانة مع التل ..

15 ناخذ المطاط حول البطن ونحاول نسحبوو عشان هوا مطاط لو جاء واسع مابيطلع حلو ونخيطو واحنا نخيط نحاول نسحب المطاط مانسحبو بقوة , 16 نقص الزوايد عشان يترتب .

ذا شكلو النهائي..

نجي للحظة الي احبهاا لحظة التزين هنا تقدري تضيفي لمستك الخاصة مااستخدمتهم كلهم بس اوريكم ايش تقدرو تزينو فيه بالوان واحجام مختلفه انا اخذت الفصوص البيضاء  الوسط والصفيرة وثبتهم بالكوي وزعتهم بحيث يكونو بعيدين عن بعض

نجي اللحين للاوت فيد....

التوب من H,Mالاساور والطوق منlife style
الحلق من for ever21
وبكذا نكون خلصنا اتمني يكون البوست عجبكم واذا عجبكم اتمني تكونو استفدتو.
good luck

outfit...

بسم الله الرحمن الرحيم...

سويت دا البوست  اليوم سريع سريع وهوا عبارة عن ايش حلبس اليوم في جمعة بنات او حفلة صغيرة هوا المفروض اعمل بوست عن كيف تسوين تنورة تل بس لسا ماصورت وباقيلو شوية لمسات..
الموهم خلينا ندخل في الموضوع ع طول لانو لسا ماستشورت وبنت عمي حتمرني واذا شافتني لسا كذا حتهزأني.
اول شئ انا اليوم مو طبيعية شوية تعبانة فقلت مافيا اتكشخ نخلي اللبس بسيط احسن من انو البس فستان او تنورة بس انتبهو الحفله بسيطة جمعة بنات بس اذا كانت حفله كبيرة لازم الكشخه خلونا نبدأ...

تي شيرت ابيض ساده حسيتو جدددن عادي أضفتلو نكلس اسود, وبنطلون او ترنق مدري ايش اسمو بس شكلو كدا يقول ترنق بس مرة عملي احس تقدري تخليه لأكثر من ستايل تقدري تلبسي عليه بليزر بيطلع حلو وينفع لنادي لجامعه ولجمعه بسيطة .

اللبس بسيط فما حبيت اكثر اكسسوارات سوار فوق الساعه نسيت اصور ساعتي بس هيا بيضاء وحلقين صغار والاسورة الذهبي مع الاسود او خلخال للرجل..

شنطة سوداء اتوقع انها من مايكل كورس حقت امي  لانو ماعندي شنطة سوداء والكارثه ماعندي فلات اسود كل مانزل السوق ابا اشتري اسود أميل للألوان الثانية وانسي الي كنت اباه بس ان شاء الله يوم الخميس حنزل واشتري لانو عملي واحس لازم عند كل بنت فلات اسود بس لقيت عندي فلات ذهبي

تهقون اقدر امشي حالي فيه؟ هوا روز قولد في الصورة مبين ذهبي ذهبي بس يلا نمشي حالنا..

بما انو اللبس بسيط فلازم الميك اب يكون سهل وبسيط حنور وجهي بالفونديشن تبع مكياجي هوا مرة خفيييف وانا استعملو كبي بي كريم لانو ابدن مايخرب البشرة وصح انو مايخفي العيوب بس تحسيه ينور الوجه,وبعدين ححط باودر من ريميل لندن ماحبيتها بس حستعملها دامني اشتريتها ,وبعدين البلاشر دا من افوون وحش مايطلع لون ابدن بس يعطي لمعه بسيطة انا استعملو كهايلايتر.وبماأنو ماحسوي شي بعيني حكثف رموشي بماسكرة ميبليين والروج والمناكير تقريبا نفس الدرجة..

والشعر حعمل كعكه بسيطة بس من غير الفيونكه..
وبكذا بيكون شكلي بسيط بس بنفس الوقت بستايل اتمني اللوك يعجبكم 
good luck